خاطرة

ساعات الوحدة بتكون ألطف بكتير من مجاورتك شخص ممكن تحس انك ف يوم من اﻷيام هتجرحه وتنيمه زعﻻن على مخدته، الوحدة بتدي في بعض اﻷحيان شعور بالقوة والانطﻻق...ملكش حد تخاف عليه وﻻ فيه حد هيتأثر لو جرالك حاجه، فيه ناس بتحب تكون لوحدها دايما، يمكن بتحب غيرها بس في حدود تخليهم دايما ميكونوش دايرة قريبة وعليه في النهاية إنت دايما فى جانب اﻷمان مفيش حد تجرحه وﻻ فيه حد هيتوجع عليك، بس يا ترى دي طريقة حلوة للحياة وﻻ اﻷفضل إننا نفضل نخبط في بعض ونعافر سوا ضد أي حاجه بس عشان نفضل قريبين من بعضنا؟
يا ترى الموضوع محير وﻻ هو أبسط من جدول الضرب بتاع الرقم 1 اللي فيه الواحد في أي رقم بيساوي نفس الرقم وعليه أي حد بيحب الوحدة ف هتكون هي اﻷفضل بالنسبة له ؟
ويا ترى لو إحنا فعﻻ بنحب بعض ممكن يكون عندنا قدر كافي من التسامح للدرجة اللي متخليش فيه حاجه بيننا اسمها وجع واننا قادرين نعدي أي حاجه وكل حاجه عشان بنحب...فكرة الحب ذاتها بتدي قوة رهيبة لكل حاجه، حتى في مواجهة وجعنا من أي حد.
يا ترى الوحدة أحسن وﻻ إننا نعافر سوا عشان نفضل جنب بعض أحسن؟؟