حكايتنا (1)

لما تيجي تدور بين الناس هتﻻقي إننا كلنا بنشبه بعض بصورة أو بأخرى،كلنا بنحب ونكره، بنخاف ونطمن، بنحقد ونغل، بنكره ونحسد، بنظلم ونجرح...بنعشق ونتألم.
كل مجموعة من الناس عايشين تحت نفس الظروف هتﻻقيهم بيشبهوا لبعض، ﻷ حتى لو مش في نفس الظروف هتﻻقينا كبني آدم بنشبه بعض من جوه، كلنا واحد.
كلنا صورة متكررة من بعض بس بنسب مختلفة، هتﻻقي كلنا عندنا أحﻻم بنتمنى نحققها على إختﻻف أهمية الحلم، كلنا بنحب أشخاص..أماكن..أو حتى حاجات وبنتمنى تفضل معانا ﻷطول فترة، كلنا بنضعف ونخاف وبنستنى نﻻقي ركن نستخبى جواه وحضن دافي نحط نفسنا فيه وننسى الدنيا بمشاكلها ولو دقايق، كلنا بنزهق من المسؤلية واﻷحمال التقيلة المرمية فوق كتافنا وبيبقى نفسنا لو كل حاجه حوالينا تتجمد لو يوم ناخد نفسنا فيه ونعيش من غير ما حد يسألنا عملتوا اللي عليكوا وﻻ ﻷ، كلنا بنغلط وكتير بنتمنى لو منتحاسبش على غلطاتنا،كلنا بنتأثر بالكلمة الحلوة وبتجرحنا كلمة مكانش نفسنا نسمعها حتى ولو حقيقة، كلنا بنشبه بعض أو يمكن أنا حاسه بده، دايما نفس التصرفات بتتكرر ونفس ردود اﻷفعال بتحصل، صعب أوي تﻻقي بني آدم مبيخافش أو مبيزعلش أو مبيحلمش أو...أو...
كنت ساعات بفتكر إن الناس اللي بﻻقيها قوية صعب أوي تكون بتخاف أو إن الصديق العاقل الرزين ممكن يضرب كل حاجه بعرض الحيطة عشان بيتحدى حد، أو إن البنت الهادية الطيبة ممكن تغير وتضر حد، بس الحقيقة إننا طلعنا كلنا نشبه بعض.