زحمة كلام

دى أول مرة اكتب فيها بالعامية ،مش عارفه ليه فجأة اخذت بالى ان دى مدونتى أنا ، ان كتّاب الوطن العربى مش هيطلوا عليها ويغمى عليهم من ان ازاى حد بيكتب بالعامية فى مدونة وان دى خواطر ولقطات من العيشة اللى أنا عايشاها ومحدش قلبه هيوجعه يعنى سواء كان الأسلوب عميق أو ضحل ، لهذا السبب قررت أكتب النهارده حاجه بالعاميه محشورة عندى.
فيه كلام بيبقى تقيل جوانا ، تقيل لدرجة انه متقل حركتنا فى الحياة مخلينا نتكلم بصعوبة ونبتسم بصعوبة وناخد حتى نفسنا بصعوبة .
بس تقل الكلام جوانا يمكن ساعات بيبقى أهون من انه يتقل على قلب وعقل واحد تانى وانك تكون صاحب السر أهون ما تشوف عيون رغرغت من الدموع بعد ما تسمع كلامك وأهون من انك تكسر قلب حد وتخليه بيتقلب على مخدته طول الليل يدور على مكان مبلتهوش دموعه عشان يعرف ينام.
فيه كلام صعب يتزوق ويطلع طعمه حلو ، جه يمين جه شمال هو كده 
صعب تقول لواحد بطلت أحبك أو يقولك فينك ف تقوله معلش أصلك بطلت توحشنى أو مسألتش عليا ليه بعد الموضوع اللى حكيتهولك ف تقوله أخبارك مبقتش مهمة بالنسبة لى صعب تقول لحد انت وقعت من نظرى ، أو تقول لحد أنا قررت اطلعك بره حياتى لأنك بقيت حمل عليا مش أكتر ..... صعب توجع حد زى ما بتستصعب حد يوجعك ويقولك انت فيك كذا وكذا وأنا مش قادر أعرفك أكتر من كده 
فكرة انك تعرف حد على عيبه وفى غفله من الزمن تقرر انك تعتبره جزء قائم فى حياتك ومع نضجك تكتشف انك قد ايه كنت غبى وقت ما قطعت بينك وبينه وعد مش منطوق بانك تخليه حته من حياتك ونفسك تفك الأسر ده أو انك تكتشف انك بتتغير للأسوأ ونفسك تبعد عن الناس اللى كنت فى يوم بالنسبه لهم حاجه حلوة ف تشغّل دماغك بالعكس فى انك ازاى تكرّه الناس دى فيك! .
علاقاتى الاجتماعيه- اللى بدعى انها كبيرة الى حد ما - لها وزن مش قليل واهتمام يكاد يكون أكتر من اهتمامى انا بنفسى وبمشاكلى الخاصة وعليه فان الناس من الحاجات اللى بتحلّى وتمرر العيشة بسهولة وعليه برضه من الصعب انى أوجع حد حتى لو مكنتش مهتمه بوجوده فى حياتى بعد كده.
الفكرة بس كلها فى تقل الكلام جواك انك تحس انك كبرت عن سنك ومبقتش قادر تبص فى وش الناس والاسوأ انك تحس بالذنب عشان خليتهم يفتكروا ان ليهم مكان عندك .