الحالة (7)

مبقتش بحكي..
بضايق. .بعيط. .بسكت خالص..فجأة ببطل اضحك واهزر....بس مبحكيش
ماهو الكلام مش هيحل حاجه ولا الفضفضة هتريحني.
انا محتاجالك انت بس. .وانت اكتر واحد هيفهم كل حاجه هقولهاله....

الحالة (6)

صباح العيد...
وليلة العيد
مستنية تعيد عليا عشان عيدي يبتدي....
مش فارق معايا أى كل سنة وانتي طيبة اتقالتلي أو قلتها لحد
بس مستنية بتاعتك انت

الحالة (5)

آخر أيام رمضان..
قبل المغرب بحوالي ساعة أو أكتر. ..
آخر جمعة في رمضان...
26 رمضان. .ليلة 27
كل ما عقلي يفكر ف دعوة يسبقني لساني بدعوة ليك..وليا..لينا احنا الاتنين
موقف غريب وجديد عليا إن كل حاجه ف حياتي تبقى واقفة مستنية شخص واحد بس يبصلها عشان تكمل وتستمر
والنهارده. .في اواخر ليالي الشهر الكريم...هدعي لينا كتير..كتير أوي زي ما هدعي دلوقتي قبل المغرب وعلى الافطار
لك..القلب

الحالة (4)

كان نغسي أول عين تقع على كلامي هي عينيك
كان نفسي تقراه أوي وتقولي رأيك
بس برضه هكتبهولك هنا عشان هو مكتوب أصلا ليك
و ف حضنك ألف حكاية وميت موال
وانا دايبه كده جواه واتمنى يدوم الحال
وافضل كده ساكنه ضلوعك من غير ما تقولي كفاية
واغني الغنوة الحلوة وانت هتقولها معايا
راح اقول للخلق بحبك وانت هتقول مظبوط
واقولك عمري ف ضلك وتقولي ثواني يفوت
وارقص على دقات قلبك والدنيا تدور ويايا
وادق الأرض برجلي وارفع صوت الضحكاية
واقولك تاني بحبك من غير ما تقولي كفاية
ده انا اغني ميت موال واكتبها ف ألف حكاية